ජවිපෙ මැයි රැළියට පාසල් ළමුනුත් ගෙනත් - සිද්ධිය හොයන්න ගිය නිලධාරියාට පොල්ලෙන් ගහන්න ඇවිත්

අම්පාර මහඔය අධ්‍යාපන කොට්ඨාසයේ වරාපිටිය මහ විදුහලේ ගුරුවරුන් පිරිසක් විසින් එම පාසලේ සිසුන් 30දෙනකු ඉකුත් මැයි පළමු වැනි දා කොළඹ බි.ආර්.සි පිටියේ පැවති ජනතා විමුක්ති පෙරමුණේ මැයි රැළියට සහභාගි කරවා ඇතැයි කියන සිද්ධියක් සම්බන්ධයෙන් මහඔය අධ්‍යාපන කාර්යාලය මගින් පරීක්ෂණයක් ආරම්භ කර තිබෙනවා.

මෙම මැයි රැළියට සහභාගි වු දරුවකුගේ පියෙකු විසින් අදාළ පැමිණිල්ල සිදු කර ඇති බවයි අප වාර්තාකරු සඳහන් කළේ. එම පාසලේ ගුරුවරුන් තිදෙනකු මෙම සිසුන් රැගෙන ගිය බවට රැළියට සහභාගි වු සිසු සිසුවියන් කලාප අධ්‍යාපන අධ්‍යක්ෂකවරයාට ලබාදුන් ලිපියේ සඳහන්. එම දරුවන්ගෙන් ආහාර සඳහා රුපියල් 200ක්ද අය කරගෙන ඇතැයි ද වැඩි දුරටත් පවසා තිබෙනවා.

අප්‍රේල් 30 වැනි දා පස්වරුවේ කොළඹ බලා පිටත්ව වී ඇති සිසුන් පසුදින අලුයම කොළඹට පැමිණි පසුව විහාරස්ථානයක ලැගුම් ගෙන තිබෙන බවත්, ඉන්පසුව තමන් ජනතා විමුක්ති මැයි රැළිය ආරම්භක ස්ථානය වෙත රැගෙන ගොස් රතු තොප්පි ලබා දි මැයි පෙළපාලියට සහභාගි කර ගත් බවත්  සිසුන් ඉදිරිපත් කර ඇති ලිපියේ  දැක්වෙනවා. වරාපිටිය විදුහලේ විදුහල්පති සේනක බංඩාරගෙන් කළ විමසීමකදී ඔහු පැවසුවේ සිසුන් රැගෙන යන බව තමන් නොදන්නා බවත් මේ ගැන සියලු තොරතුරු මහඔය කලාප අධ්‍යාපන අධ්‍යක්ෂට දැනුම් දුන් බවයි.

මහඔය කලාප අධ්‍යාපන අධ්‍යක්ෂක කේ.බී. ධර්මදාස පැවසුවේ වරාපිටිය ගම්මානයේ දෙමව්පියන්ගෙන් ලැබුණු තොරතුරක් මත තමන් මේ ගැන පරීක්ෂණයක් කිරීමට වරාපිටිය විදුහලට ගිය අවස්ථාවේ ගුරුවරයකු පොල්ලකින් තමන්ට පහර දීමට පැමිණි බවයි. පසුව තමන් 119 දුරකථන අංකයට දැනුම් දී, මහඔය පොලිසියෙන් පැමිණි පසු මේ ගැන සිසුන්ගෙන් ලිඛිත සටහන් ලබාගත් බවත් පැවසුවා. මෙම ගුරුවරයාගෙන් ලැබුණ විරෝධය නිසා පරීක්ෂණ කටයුතු තාවකාලිකව නවතා ඇති බවත් මේ සම්බන්ධයෙන් නැගෙනහිර පළාත් සභාවේ අධ්‍යාපන ලේකම්වරයාගෙන් උපදෙස් ඉල්ලා ඇති බවත් ඔහු වැඩි දුරටත් පැවසුවා.


Share on Google Plus

About විගස පුවත් 24x7

විගස පුවත් වෙබ් අඩවිය මෙරට දේශපාලන ප‍්‍රවෘත්ති පාඨක ජනතාවට සැපයීමේ අරමුණින් ක‍්‍රියාත්මක වන ප‍්‍රමුඛ පෙලේ වෙබ් අඩවියකි. අප වෙබ් අඩවිය ජාතිවාදයෙන් තොර සමස්ථ ලාංකිකයින්ටම පොදු අන්තර්ජාල පුවත් භාවිතයක නිරතවන බව අපි මෙසේ වගකීමෙන් දැනුම් දෙන්නෙමු. (බාහිර වෙබ් අඩවි වලින් ගනු ලබන තොරතුරු වල සත්‍යතාවය පිලිබදව අප වගකීම් නොදරන බව කාරුණිකව සලකන්න.)

0 comments:

Post a Comment