දංකොටුවේ පාසල් දැරියක් අතුරුදන්

පාසලෙහි පැවැත්වෙන උපකාරක පන්තියකට සහභාගිවීම සදහා යන බව පවසා නිවසින් පිටත්ව ගිය පාසල් සිසුවියක් අතුරුදන්වී ඇති බව දංකොටුව පොලීසිය ප්‍රකාශ කරයි.

මෙලෙස අතුරුදන්වී ඇත්තේ දංකොටුව - බණ්ඩිරිප්පුව ප්‍රදේශයේ පදිංචිව සිටි 18 හැවිරිදි පාසල් සිසුවියකි.

ඇය දංකොටුව ප්‍රදේශයේ පාසලක ඉගෙණුම ලබමින් සිට ඇත.

අතුරුදහන්වී ඇති සිසුවිය පසුගියදා නිමාවට පත්වූ අධ්‍යාපන පොදු සහතික පත්‍ර උසස් පෙළ විභාගයටද පෙනී සිටි සිසුවියකි.

ඇයගේ පියා මිය ගොස් ඇති අතර මව මේ වන විට රැකියාවක් සදහා විදේශගතව සිටී.

ඇය තම සීයා සහ මිත්තණිය භාරයේ සිට ඇති බව පොලීසිය සඳහන් කරයි.

පසුගිය 28 වැනිදා පෙරවරු 6.30 ට පමණ පාසලේ පැවැත්වෙන උපකාරක පන්තියකට යන බව පවසා ඇය නිවසින් පිටත්ව ගොස් ඇති අතර එදින සවස වන තුරු ඇය යළි නිවසට පැමිණ නැත.

ඒ අනුව තම මිණිපිරියගේ අතුරුදන්වීම සම්බන්ධයෙන් දැරිවියගේ සීයා සහ මිත්තණිය විසින් පොලීසියට පැමිණිල්ලක් කොට තිබේ.

දංකොටුව පොලීසිය විසින් සිද්ධිය පිළිබඳ වැඩිදුර විමර්ශණ මෙහෙයවයි.

පුත්තලම - ජුඩ් සමන්ත