ජනපති දියණිය චතුරිකා රාජ්‍ය නිලධාරීන් පිරිවරා…

ජනාධිපති මෛත‍්‍රිපාල සිරිසේන මහතාගේ දියණිය චතුරිකා සිරිසේන මහත්මිය පෙරේදා දිනයේ පොලොන්නරැව වැලිකන්දේ පැවති උත්සවයකට සහභාගී විය.

එහිදී ඇය සේනපුර මහවැලි කොට්ඨාස කාර්යාලයේදී ප‍්‍රදේශයේ ආගමික නායකයන්, රාජ්‍ය ආයතන ප‍්‍රධානීන් ඇතුළු ගොවීන් 120 දෙනෙකුට පමණ උපහාර පිදීමක්ද සිදු කලාය.

එහිදී සභාව අමතමින් ඇය කියා සිටියේ ජනපති වූ තම පියාට එම ධූරය සදාකාලික වරමක් නොවන බවත් එම වරම අද තිබී හෙට නැතිවිය හැකි එකක් නිසා ඉන් සමාජයට ඉටුවිය යුතු යුතුකම් නිසකව සිදුවිය යුතු බවයි.

‘මේ ජනාධිපතිධූර කාලයේදී පුලතිසිපුර රන් අස්වනු නෙළන්න කාලයක් කර ගමු කියලා මම ඔබලාට කියනවා. ජාති ආගම් පක්ෂ පාට නොබලා මේ රට ගොඩ නගන්න ජනාධිපතිවරයාට ශක්තියක් වෙමු. 2020 වන විට මතින් තොර රටක් බිහි කිරීම අපේ අරමුණයි. කෘමිනාශක වලින් තොරව වගා කටයුතු කරලා වකුගඩු රෝගවලින් මේ රටේ ජනතාව මුදා ගැනීමත් අපේ අරමුණක්’ යයි ඇය එහිදී කියා සිටියාය.

සේනපුර මහවැලි කොට්ඨාස කාර්යාලය මගින් සංවිධානය කරන ලද මෙම උත්සවය සඳහා මහවැලි සහ පරිසර අමාත්‍යාංශයේ ජනාධිපති සම්බන්ධීකරණ ලේකම් මහින්ද රත්නායක, මහවැලි බී කලාපීය නේවාසික ව්‍යාපාර කළමනාකාර ජයසිංහ කිරිඇල්ල, වැලිකන්ද ප‍්‍රාදේශීය ලේකම් එච්.එස්.කේ. ජේ බණ්ඩාර, පොළොන්නරුව ජේ්‍යෂ්ඨ පොලිස් අධිකාරි ලක්සිරි විජේසේන ඇතුළු පිරිසක් සහභාගි වූහ.