යෝජනා පිලි නොගත්තොත් ස්ථිරවම පොදු අපේක්ෂකයාට සහාය දෙනවා

මීළග ජනාපධිතිවරණයට පෙර විධායක ජනාධිපති ධූරය අහෝසි කිරීම හා නව ආණ්ඩුක‍්‍රම ව්‍යවස්ථාව සම්බන්ධ යෝජනාවලිය ක‍්‍රියාත්මක කිරීමට රජය  අපොහොසත් වන්නේ නම් ස්ථිර වශයෙන්ම රජයෙන් ඉවත්වී පොදු අපේක්ෂකයකු ජනාධිපති කරවන බව පාර්ලිමේන්තු මන්ත‍්‍රී අතුරලියේ රතන හිමියෝ පවසති.

උන් වහන්සේ මේ අදහස් පල කලේ පිවිතුරු හෙටක් සංවිධානයේ ඉදිරි ක‍්‍රියාමාර්ග සම්බන්ධයෙන් කරුණු පැහැදිලි කරමිනි.

‘අනිවාර්යයෙන්ම මෙම යෝජනාවලිය පාර්ලිමේන්තුවට ඉදිර්පත් කර පාර්ලිමේන්තුව නියෝජනය කරන මැති ඇමතිවරුන්ගෙන් විවාදයකින් පසු සම්මත කර  ජනතාවට අතරට ගෙනයෑමේ අවස්ථාවක් උදාවී යැයි විශ්වාස කරනවා.  

තවද ජනාධිපතිවරණය ජනවාරි හෝ මාර්තු යන මාස දෙක ඇතුළත පැවැත්වෙන බවට රාවයක් පවතිනවා.  

ආණ්ඩුව සමග සන්ධාන ගතවූ කුමන දේශපාලන පක්ෂයක් කුමන මතයක් දැරුවත් පිවිතුරු හෙටක් සංවිධානය මෙන්ම ජාතික හෙළ උරුමය ආණ්ඩුව සමග තවදුරටත් කටයුතු කරන්නේ විධායක ජනාධිපති ධූරය මෙන්ම නව ආණ්ඩුක‍්‍රම ව්‍යවස්ථාව සංශෝධනය කර ක‍්‍රියාත්මක කළහොත් පමණයි’ යයිද උන් වහන්සේ කියා සිටිති.