මහින්දගේ තීරණය උතුර මැද මන්ත්‍රීවරුන්ට දන්වයි

“ කල්පනා කර බලා , කැමති තීරණයක් ගන්න” යැයි උතුර මැද පළාත් සභාවේ එක්සත් ජනතා නිදහස් සන්ධාන මන්ත්‍රීවරුන්ට තමා දැනුම් දුන් බව හිටපු ජනාධිපති මහින්ද රාජපක්ෂ මහතා ප්‍රකාශ කර තිබෙනවා.

උතුර මැද  පළාත් සභාවේ හිටපු මැති ඇමතිවරුන් පිරිසක් පසුගිය සිකුරාදා තමා හමුවීමට පැමිණී මොහොතේ ඔවුන්ට මෙම දැනුම්දීම සිදු කළ බව ද හිටපු ජනාධිපතිවරයා වැඩිදුරටත් කියා සිටිනවා.

උතුර මැද පළාත් සභාවේ පාලන බලය හිමි එක්සත් ජනතා නිදහස් සන්ධානයේ බහුතර පිරිසක් ඒකාබද්ධ විපක්ෂයට සහය පල කරන බව පාර්ලිමේන්තු මන්ත්‍රී එස්.එම්. චන්ද්‍රසේන මහතා පසුගිය දා ප්‍රකාශ කළා. ඒ අනුව, බහුතරයේ කැමැත්ත ඇති පුද්ගලයා මහ ඇමතිවරයා ලෙස පත් කිරීමට තමන්ට හැකි බව ද එස්.එම්.චන්ද්‍රසේන මහතා වැඩිදුරටත් මාධ්‍ය වෙත කියා සිටියා.