ශ්‍රීලනිප ඇමතිවරු තනතුරු අතහැරීමේ සුදානමක !

අමාත්‍ය ධූර ලබා ගනිමින් වත්මන් ආණ්ඩුවට සම්බන්ධ වී සිටින අමාත්‍යවරුන් පහළොස් දෙනෙකු ඓතිහාසික තීරණයකට එළඹීමට සූදානමින් සිටින බව පාර්ලිමේන්තු මන්තී‍්‍ර ටී.බී ඒකනායක මහතා පවසයි.

දේශපාලන වශයෙන් නිර්මාණය වී ඇති තත්වයන් සහ ජනමතය පිළිබඳ සැළකිලිමත් වෙමින් ඔවුන් මෙවැනි තීරණයකට පැමිණ ඇති බව, 'වී එෆ්.එම්.' ගුවන් විදුලිය සමග දුරකථන සංවාදයකට එක් වෙමින් පාර්ලිමේන්තු මන්තී‍්‍ර ටී.බී ඒකනායක මහතා සඳහන් කළේය.

ඇමති ධුර දරණ ශ‍්‍රී ලංකා නිදහස් පක්ෂයේ නියෝජිතයින් දස දෙනෙකු පමණ අමාත්‍ය ධූරවලින් ඉවත් වීමට තීරණය කර ඇති බව පසුගිය දිනවල ඇතැම් මාධ්‍ය විසින්ද වාර්තා කර තිබිණ.

පළාත් පාලන ආයතන කොමසාරිස් පාලනයකට නතු කිරීමේ තීරණයට එරෙහිව ඔවුන් මෙවැනි කි‍්‍රයාමාර්ගයකට අනුගත වීමට සූදානමින් සිටින බව එම වාර්තාවල සඳහන් විය.

කෙසේ වෙතත් ටී.බී ඒකනායක මන්තී‍්‍රවරයා ප‍්‍රකාශ කළේ සමස්ත දේශපාලන කි‍්‍රයාවලිය නිසි ලෙස අධ්‍යයනය කිරීමකින් පසු අදාළ අමාත්‍යවරුන් මෙවැනි තීරණයකට එළඹ ඇති බවයි.

අමාත්‍ය ධූර වලින් ඉවත් වීමේ යම් තීරණයකට එළඹෙන්නේදැයි නියෝජ්‍ය අමාත්‍ය ලලිත් දිසානායක මහතා ගෙන් කල විමසීමකදී ඔහු කියා සිටියේ, පක්ෂයේ මධ්‍යම කාරක සභාව එවැනි තීරණයකට එළඹෙන්නේනම් අමාත්‍ය ධූරවලින් ඉවත් වීමට සූදානම් බවයි.

අකමැත්තෙන් ගත්ත දෙයක් :

මේ අතර, ග්‍රාමීය ආර්ථික කටයුතු අමාත්‍ය එස්.බී. දිසානායක මහතා පවසන්නේ, වත්මන් ආණ්ඩුවේ ඇමතිකම් ලබාගැනීම සතුටින් කළ දෙයක් නොවන බවයි.

ඔහු මේ බව කියා සිටියේ අස්ගිරි පාර්ශවයේ අභිනව මහානායක අතිපූජ්‍ය ගලගම ශ්‍රී අත්තදස්සී මහානාහිමියන් මහනුවරදී ඊයේ (16) බැහැදැකීමෙන් අනතුරුව මාධ්‍ය වෙත අදහස් දක්වමිනි.

විපක්ෂයේ සිට කටයුතු කිරීමට වැඩි කැමැත්තෙන් පසුවුවත්, ජනාධිපතිවරයාගේ ඉල්ලීම මත අමාත්‍ය ධුරය ලබාගත් බව ඔහු සඳහන් කළේය.