නව සන්ධානයේ නායකත්වය සහ අගමැති අපේක්ෂකත්වය සජිත් ප්‍රේමදාසට

එක්සත් ජාතික පක්‍ෂ නායකයා ලෙස තවදුරටත් රනිල් වික්‍රමසිංහ මහතාත්, පිහිටුවනු ලබන එක්සත් ජාතික පක්‍ෂය ප්‍රමුඛ සන්ධානයේ නායකයා සහ අගමැති අපේක්‍ෂකයා ලෙස සජිත් ප්‍රේමදාස මහතාත් පත් කිරීමට ඊයේ (30දා) ‘සිරිකොත’ පක්‍ෂ මූලස්ථානයට රැස්වූ එ.ජා.ප. කෘත්‍යාධිකාරී මණ්ඩලය තීරණය කළේය.
මේ තීරණය ගෙන ඇත්තේ එ.ජා.ප. කෘත්‍යාධිකාරී මණ්ඩල පූර්ණ සාමාජිකත්වය නොමැතිවීම විශේෂත්වයකි.

කලින් වසරේ එ.ජා.ප. කෘත්‍යාධිකාරී මණ්ඩල සාමාජිකයන් සිවුදෙනකුගේ සාමාජිකත්වය මෙවර අහෝසි කර තිබිණි.

එම තීරණයට විරෝධය පළ කරමින් එ.ජා.ප. නියෝජ්‍ය නායක, විපක්‍ෂ නායක සජිත් ප්‍රේමදාස මහතා ඇතුළු මන්ත්‍රිවරුන් පිරිසක් ඊයේ (30දා) පැවැති කෘත්‍යාධිකාරී මණ්ඩල රැස්වීම වර්ජනය කිරීමට පියවර ගෙන තිබිණි.

එක්සත් ජාතික පක්‍ෂ ව්‍යවස්ථාවට අනුව එම කෘත්‍යාධිකාරී මණ්ඩලයට සාමාජිකයන් 59ක් සිටින අතර ඊයේ පැවැති රැස්වීමට සහභාගි වී ඇත්තේ කෘත්‍යාධිකාරී මණ්ඩල සාමාජිකයන් 37 දෙනකු පමණි. නොපැමිණි සාමාජිකයන් 22 දෙනාගෙන් සජිත් ප්‍රේමදාස මහතා ඇතුළු 16 දෙනකු රැස්වීමට නොපැමිණීම පිළිබඳව කලින් දන්වා නොතිබූ බවත්, 6 දෙනකු පමණක් එදින සහභාගි නොවන බව දැනුම් දුන් බවත්, එජාප මහ ලේකම් අකිල විරාජ් කාරියවසම් මහතා පැවැසීය.

ඉදිරි මහ මැතිවරණයට තරග වදින එක්සත් ජාතික පක්‍ෂය ප්‍රමුඛ සන්ධානයේ නායකත්වය, මැතිවරණ මෙහෙයවීමේ නායකත්වය සහ අගමැති අපේක්‍ෂකත්වය සජිත් ප්‍රේමදාස මහතාට දීමට තීරණය කළ බවද හෙතෙම කීවේය.

එමෙන්ම ලබන බ්‍රහස්පතින්දා (6දා) එජාප කෘත්‍යාධිකාරී මණ්ඩලය නැවත රැස්වී ඉදිරි කටයුතු පිළිබඳ තීන්දු තීරණ ගැනීමටද එහිදී තීරණය කළ බවද ඔහු කීවේය.

කෘත්‍යාධිකාරී මණ්ඩලයෙන් ඉවත් කරන ලද සාමාජිකයන් පිළිබඳ විනය පරීක්‍ෂණ පවත්වා ඉදිරි ක්‍රියාමාර්ග ගැනීමට එහිදී තීරණය කළ බව පාර්ලිමේන්තු මන්ත්‍රි අජිත් මාන්නප්පෙරුම මහතා පැවැසීය.

එක්සත් ජාතික පක්‍ෂ කෘත්‍යාධිකාරී මණ්ඩලයේදී අදහස් දක්වමින් ජෝන් අමරතුංග මහතා යෝජනා කර ඇත්තේ, කෘත්‍යාධිකාරී මණ්ඩලයට නොපැමිණෙන අය වෙනුවට නව සාමාජිකයන් පත් කළ යුතු බවකි. එහිදී ඊට ඒකමතිකව අනුමැතියක් හිමිවූ බවද එම පක්‍ෂයේ ජේ‍යෂ්ඨයෙක් සඳහන් කළේය.

එමෙන්ම මංගල සමරවීර මහතා පවසා ඇත්තේ, සජිත් ප්‍රේමදාස මහතාට ජනාධිපති අපේක්‍ෂකත්වය දීමේදී රනිල් වික්‍රමසිංහ මහතා එජාප නායකත්වයේ සිටිය යුතු බවට තමා එදා පැවැසූ ස්ථාවරයේ අදත් සිටි බවත්, එය වෙනස් නොවන බවත් සඳහන් කර තිබේ.

රවි කරුණානායක මහතා අදහස් දක්වමින්, පසුගිය ජනාධිපතිවරණයේදී තිස්සමහරාම ආසනයෙන් සජිත් ප්‍රේමදාස මහතා ඡන්ද හතළිස් නව දහසකින් පරාජය වූ බව ප්‍රකාශ කොට ඇත්තේ ඔහු පක්‍ෂ නායකත්වයට නුසුදුසු බව අවධාරණය කරමින්ය.

ඉකුත් වසරේ කෘත්‍යාධිකාරී මණ්ඩල සාමාජිකයන් ලෙස කටයුතු කළ පාර්ලිමේන්තු මන්ත්‍රිවරු වන ෆීල්ඩ් මාර්ෂල් සරත් ෆොන්සේකා, අජිත් පී. පෙරේරා. කොළඹ පුරපතිනි රෝසි සේනානායක හා හිටපු පාර්ලිමේන්තු මන්ත්‍රි ඉම්තියාස් බාකීර් මාකාර් යන අය මෙවර කෘත්‍යාධිකාරි මණ්ඩලයට පත්කර නොතිබූ අතර ඔවුන්ට රැස්වීමට සහභාගි වන ලෙස දැනුම් නොදීම ඔවුනගේ සාමාජිකත්වය අත්හිටුවීම නිසා සිදුකළ එකකැයි එජාප ජේ‍යෂ්ඨයෙක් ‘මව්බිම’ට පැවැසීය.

කළුතර දිස්ත්‍රික් පාර්ලිමේන්තු මන්ත්‍රි අජිත් පී. පෙරේරා කෘත්‍යාධිකාරී මණ්ඩලයෙන් ඉවත් කිරීමට ගත් තීරණයට ඊයේ කෘත්‍යාධිකාරී මණ්ඩල අනුමැතිය ලැබී ඇත.

ඉදිරි මහ මැතිවරණයේදී අපේක්‍ෂකයන්ට නාම යෝජනා ලබාදීමට අදාළ ‘නාම යෝජනා මණ්ඩලයක්’ පත්කිරීමටද මෙහිදී තීන්දු කරනු ලැබීය.

දෙනගම ධම්මික රණවීර, උපතිස්ස පෙරේරා, ඩබ්ලිව්.කේ ප්‍රසාද් මංජු, ශිරාන් රණසිංහ