මොරගහකන්ද ජලාශය හදා මං මැජික් පෙන්නුවා..- වේල්ල උඩ සිට ජනපති කියයි..[Video]

මොරගහකන්ද ජලාශය ඉදිකර තමනටද මැජික් පෙන්වීමට හැකි වූ බවත් ඒ පිලිබදව තමන් සතුටට පත් වන බවත් ජනාධිපති මෛත‍්‍රීපාල සිරිසේන මහතා පවසයි.

මොරගහකන්ද ජලාශයේ ඉදිකර ඇති බලාගාරයේ විදුලිල ජනන යන්ත‍්‍ර පරීක්‍ෂා කිරීමට ආරම්භ කිරීමේ අවස්ථාව ජනාධිපතිවරයා අතින් අද දිනයේ සිදු වූ අතර එම අවස්ථාවට සහභාගී වූ ඔහු එසේ කියා සිටියේය. ‘මේ දර්ශණය දකින්නෙ කවදද කියල තමයි මගේ ඔළුවෙ තිබුනේ. 1994දී මං නියෝජ්‍ය ඇමතිවරයෙක් වෙලා ඉන්න කාලෙ අපි ගියා රන්දෙනිගල, රන්ටැඹේ බලන්න.

ඉන්ජිනියර් කියල තිබුන තව දවස් දෙක්ක යනකොට ස්පිල් කරනවා රන්දෙණිගල වික්ටෝරියා. ඒ හින්දා ඔක්කොම එකට යනවා කියල. මම හුගාක් වෙලා බලාගෙන හිටිය. ඒ ඉවරවෙලා මාසෙකින් දෙකකින් මැතිවරණය තිබුණ. මට හොදට මතකයි යූඑන්පී එකේ රැස්වීමක් තිබුන පොලොන්නරුව ටවුන් එකේ.

ආර්.ඒ.ඞී. සිරිසේන කතාවක් පවත්වනවා. මං එහා පැත්තෙ ගෙදරක ඉදන් ගස්වීම අහනවා. ඉතින් එදා කියනවා මෙයා නියෝජ්‍ය ඇමති වෙලා මෙයා මැජික් බලන්න ගියා. ගාමිණි දිසානායකලා අපි එකතුවෙලා කරපු මහවැලිය වික්ටෝරියා, රන්දෙණිගල මෙයා බලාගෙන හිටියා. එයාට ඒක මැජික් එකක්.

ඉතිං මං සතුටු වෙන්නෙ ඒ මැජික් එක මටත් පෙන්වන්න පුළුවන් වුණා’ යයි ජනාධිපතිවරයා මොරගහකන්ද ජලාශයේ වේල්ල මතදී කියා සිටියේය. 2007 වසරේදී ආරම්භ කරන ලද මොරගහකන්ද ජලාශයේ වැඩ කටයුතු මේ වන විට 90%ක් පඹණ අවසන් වී ඇත.