ගුවන් විදුලියේ, බෞද්ධයා නාලිකාවේ අන්තවාදී වැඩසටහන් - ඇමැති මංගල මාධ්‍ය ගැන වාර්තාවක් ඉල්ලයි

ශ්‍රී ලංකා ගුවන්විදුලි සංස්ථාව සහ වෙනත් පෞද්ගලික ගුවන්විදුලි සහ රූපවාහිනී මාධ්‍ය මගින් විසුරුවා හරින බෞද්ධ සහ ඉස්ලාම් අන්තවාදී වැඩසටහන් සම්බන්ධයෙන් දිනපතා වාර්තාවක් ලබා දෙන ලෙස මුදල් සහ ජනමාධ්‍ය ඇමැති මංගල සමරවීර මහතා රජයේ ප්‍රවෘත්ති දෙපාර්තමේන්තුවට උපදෙස් දී තිබේ.

ශ්‍රී ලංකා ගුවන්විදුලි සංස්ථාව මඟින් 102.1FM සංඛ්‍යාතය ඔස්සේ පවත්වාගෙන යන දෙමළ නාලිකාවේ පෙරවරුවේ සහ පස්වරුවේ පැය දෙක බැගින් ඉස්ලාම් අන්තවාදී වැඩසටහන් විසුරුවා හරින බව තහවුරු කරගෙන ඇතැයි වාර්තා වේ. ඉස්ලාම් ආගම අදහන දරුවන්ට එමඟින් ආගමික අන්තවාදය සම්බන්ධයෙන් උපදෙස් රැසක් ලබා දෙන බව අමාත්‍යාංශය මඟින් නිරීක්ෂණය කර ඇති බවත් ශ්‍රී ලංකා ගුවන්විදුලි සංස්ථාවේ නව සභාපති සුදර්ශන ගුණවර්ධන ප්‍රමුඛ අධ්‍යක්ෂ මණ්ඩලයට ද වහාම මේ සම්බන්ධයෙන් පියවර ගන්නා ලෙස ඇමැතිවරයාගේ පාර්ශ්වයෙන් දැනුම් දී ඇත.

එසේ ම පෞද්ගලික ගුවන්විදුලි නාලිකාවක් වන බෞද්ධයා නාලිකාව මඟින් ද බෞද්ධ වැඩසටහන් අවසානයේ සංහිඳියාවට බාධා ඇති කරන ප්‍රකාශ ප්‍රචාරය කරන බව ද නිරීක්ෂණය වී තිබේ. මේ නිසා ඒ සම්බන්ධයෙන් ද නිරීක්ෂණය කර දෛනික වාර්තාවක් ලබා දෙන ලෙස ඇමැතිවරයා රජයේ ප්‍රවෘත්ති දෙපාර්තමේන්තුවට උපදෙස් දී ඇත. මීට අමතරව ඇතැම් රූපවාහිනී නාලිකා මඟින් අධිරජ ධර්මාශෝක වැනි වැඩසටහන් හරහා අන්තවාදී මත සමාජගත කිරීමේ උත්සාහයක යෙදී සිටින බවත්, එම වැඩසටහන් ද නිරීක්ෂණය කළ යුතු බවත් මාධ්‍ය ආයතනවල ඉහළ නිලධාරීන් සහ ඇමැතිවරයා සමඟ පැවැති විශේෂ සාකච්ඡාවක දී තීරණය වී ඇත. 

මේ සම්බන්ධයෙන් ඉදිරියේ දී මාධ්‍ය ආයතන ප්‍රධානීන් මෙන්ම ප්‍රවෘත්ති වාර්තාකරණයේ දී අදාළ සංවේදී කරුණු වාර්තා කරන ආකාරය සම්බන්ධයෙන් ජනමාධ්‍යවේදීන් ද දැනුවත් කෙරෙන වැඩසටහන් රැසක් ක්‍රියාත්මක කිරීමට ද මුදල් හා ජනමාධ්‍ය අමාත්‍යංශය සැලසුම් කර තිබේ.
-සත්හඩ-


Share on Google Plus

About විගස පුවත් 24x7

විගස පුවත් වෙබ් අඩවිය මෙරට දේශපාලන ප‍්‍රවෘත්ති පාඨක ජනතාවට සැපයීමේ අරමුණින් ක‍්‍රියාත්මක වන ප‍්‍රමුඛ පෙලේ වෙබ් අඩවියකි. අප වෙබ් අඩවිය ජාතිවාදයෙන් තොර සමස්ථ ලාංකිකයින්ටම පොදු අන්තර්ජාල පුවත් භාවිතයක නිරතවන බව අපි මෙසේ වගකීමෙන් දැනුම් දෙන්නෙමු. (බාහිර වෙබ් අඩවි වලින් ගනු ලබන තොරතුරු වල සත්‍යතාවය පිලිබදව අප වගකීම් නොදරන බව කාරුණිකව සලකන්න.)

0 comments:

Post a Comment