වියලි කාලගුණය තවදුරටත් - විශාල ජනතාවක් පීඩාවට

මේ වන විට දිවයිනේ බොහෝ ප්‍රදේශවලට බලපා ඇති අධික වියලි කාලගුණික තත්ත්වය හේතුවෙන් විශාල ජනතාවක් පීඩාවට පත් වී ඇත.

ඒ අනුව මෙම වියලි කාළගුණ තත්ත්වය හේතුවෙන් දැඩි බලපෑමට ලක්ව ඇති පොලොන්නරුව දිස්ත්‍රික්කයේ පවුල් 6000කට ආසන්න පිරිසක් පීඩාවට පත්ව තිබේ.

ඒෂියන් මිරර් කළ සංචාරයේදී පොළොන්නරුව, සෝමාවතිය, ලංකාපුර, හිඟුරක්ගොඩ, තමන්කඩුව ආදී ප්‍රදේශවල දැඩි වියලි කාළගුණ තත්ත්වය නිසා ජලය නොමැති කමින් විශාල ජනතාවක් පීඩාවට ලක් වී ඇති බව අනාවරණ විය.

විශේෂයෙන් අද පොහෝ දිනය හේතුවෙන් පොළොන්නරුව, සෝමාවතිය ප්‍රදේශවලට විශාල පිරිසක් දිවයිනේ විවිධ ප්‍රදේශවලින් පැමිණ තිබුණද ඔවුන්ට අවශ්‍ය ජලය ලබාදීම අඛණ්ඩව සිදු කර තිබෙනු දක්නට ලැබිණ.

වැලිකන්ද, ලංකාපුර, දිඹුලාගල සහ තමන්කඩුව යන ප්‍රාදේශීය ලේකම් කොට්ඨාසවලට අයත් ගම්මානවල ජනතාව පීඩාවට ලක්ව ඇත.

වියලි කාලගුණ තත්ත්වයත් සමග  ගම්මානවල පවතින ළිං මෙන්ම ජල මූලාශ්‍ර රැසක් සිදීයාමට ලක්ව තිබේ. 

පානීය ජල ගැටළුවට මුහුණදී සිටින පොලොන්නරුව දිස්ත්‍රික් ජනතාව සඳහා ආපදා ඒකකය මැදිහත්ව ජල බවුසර් මගින් බීමට ජලය ලබාදීමට  පියවර ගෙන ඇතත් එය ප්‍රමාණවත් නොවන බව ප්‍රදේශවාසීන් පවසති.

මේ අතර කාලගුණ විද්‍යා දෙපාර්තමේන්තුව සඳහන් කළේ දිවයින හරහා සහ දිවයින අවට මුහුදු ප්‍රදේශවල විටින්විට හමන තරමක් තද සුළං (පැ.කි.මී. 50-55 පමණ) තවදුරටත් බලාපොරොත්තු වන බවයි. 

හෙට දිනයේ බස්නාහිර, සබරගමුව සහ මධ්‍යම පළාත්වලත්, ගාල්ල සහ කුරුණෑගල දිස්ත්‍රික්කවලත් තැනින් තැන සිහින් වැසි ඇති විය හැකි බවත් උතුර සහ ඌව පළාත්වලත්, මඩකළපුව  සහ අම්පාර දිස්ත්‍රික්කවලත් ස්ථාන ස්වල්පයක සවස 2.00 න් පමණ පසු ගිගුරුම් සහිත වැසි  ඇති විය හැකි බවත් කාළගුණ වාර්තාවේ දැක්වේ.

ගිගුරුම් සහිත වැසි ඇති වන විට එම ප්‍රදේශවල තාවකාලිකව තද සුළං ඇති විය හැක. අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස එම දෙපාර්තමේන්තුව ජනතාවගෙන් කාරුණිකව ඉල්ලා සිටියි.

පවතින වියළි කාලගුණයත් සමඟ දිවයිනේ ඇතැම් ජලාශවල ජල මට්ටම 35% ක් දක්වා පහළ ගොස් ඇති බව වාරිමාර්ග දෙපාර්තමේන්තුව පවසයි.

එහෙත් සමස්තයක් ලෙස වාරිමාර්ග දෙපාර්තමේන්තුව යටතේ පවතින ප්‍රධාන ජලාශවල ප්‍රමාණවත් ලෙස ජලය පවතින බවත් ගංගාවල ජල මට්ටමද එලෙසම පහළ මට්ටමක පවතින බවත් එම දෙපාර්තමේන්තුව සඳහන් කරයි.