අතුරුදන්වී හමුවූ හම්බන්තොට තරුණයා රිමාන්ඩ්

හම්බන්තොට පොලීසිය විසින් අත්අඩංගුවට ගෙන පසුව අතුරුදන් වූ බව කියන හම්බන්තොට, බදගිරිය ප්‍රදේශයේ පදිංචිව සිටි තරුණයා පොලිස් මුලස්ථානයට බාරවීමෙන් පසුව අද (16) අලුයම 02.30 පමණ හම්බන්තොට දිසා විනිසුරු මංජුල කරුණාරත්න මහතා වෙත ඉදිරිපත් කිරීමෙන් පසුව මෙම මස  21 වනදා තෙක් රක්ෂිත බන්ධනාගාර ගත කිරීමට නියෝග කළේය.

පසුගිය 05 වනදා වී සොරකමක් සම්බන්ධයෙන් සැකපිට අත්අඩංගුවට ගැනුණු හම්බන්තොට බදගිරියේ පදිංචි ජි .ජි ගයාෂාන් නැමති තරුණයා පසුගිය 06 වනදා අලුයම හම්බන්තොට පොලිසියෙන් පළාගොස් පසුව දින 10 ට පමණ පසු  එම තරුණයා දික්වැල්ල දීඝවාළුකාරාම රජමහා විහාරයේ අඹකොළවැව බුද්ධික හිමියන් විසින් පොලිස් මාධ්‍ය  ප්‍රකාශක  අජිත් රෝහණ මහතාට දැන්විමෙන් පසු කොළඹට රැගෙන ගොස් පොලිස් මූලස්ථානයට බාර දී තිබිණි.

පොලිස් මුලස්ථානයේ නියෝග මත මාතර ප්‍රධාන පොලිස් පරික්ෂක කල්දේරා මහතා වෙත සැකකාර තරුණයා හම්බන්තොට අධිකරණය වෙත ඉදිරිපත් කිරීමට ලැබී තිබු නියෝග මත තංගල්ල කොට්ඨාස අපරාධ විමර්ශන අංශය මගින් හම්බන්තොට මහේස්ත්‍රාත් වෙත සැකකරු අද අලුයම ඉදිරිපත් කර තිබේ.