අනුර සේනානායකගේ ඇප අයැදුම සලකා බැලේ….

වසීම් තාජුදීන්ගේ මරණය සම්බන්ධයෙන් රක්ෂිත බන්ධනාගාර ගත කර සිටින හිටපු ජ්‍යෙෂ්ඨ නියෝජ්‍ය පොලිස්පති අනුර සේනානායක මහතාට ඇප ලබා දෙන ලෙස ඉල්ලා ගොනු කර තිබූ ඇප අයැදුම්පතක් සැප්තැම්බර් මස 08 වනදා සලකා බැලීමට අද (25) කොළඹ මහාධිකරණය තීරණය කළේය.

කොළඹ මහේස්ත්‍රාත් අධිකරණය මගින් වසීම් තාජුදීන්ගේ මරණය සම්බන්ධයෙන් තමා රක්ෂිත බන්ධනාගාර ගත කර ඇති නියෝගය නීතියට පටහැනි බව අදාළ ඇප අයදුම්පත ඉදිරිපත් කරමින්  හිටපු ජ්‍යෙෂ්ඨ නියෝජ්‍ය පොලිස්පති අනුර සේනානායක මහතා ප්‍රකාශ කර ඇත.

එබැවින් එය ප්‍රතිශෝධනය කර  තමන්ට ඇප ලබා දෙන ලෙස අනුර සේනානායක මහතා ඉදිරිපත් කළ ඇප අයදුම්පත මගින් ඉල්ලා ඇත. එසේම ඇප අයදුම්පතට අදාළ විරෝධතා ඇත්නම් ඉදිරිපත් කරන ලෙස ඇප අයදුම්පතේ වග උත්තරකරුවන් ලෙස නම් කර තිබෙන අපරාධ පරීක්ෂණ දෙපාර්තමේන්තුවේ අධ්‍යක්ෂවරයා, නීතිපතිවරයා ඇතුළු පිරිසට  අධිකරණය නොතිසීද නිකුත් කළේය.