බැසිල්ගේ පෙත්සම ඉවතට

හිටපු ආර්ථික සංවර්ධන අමාත්‍ය බැසිල් රාජපක්ෂ මහතා විසින් ඉදිරිපත් කර තිබූ මූලික අයිතිවාසිකම් පෙත්සමක් විභාගයට නොගෙනම ප්‍රතික්ෂේප කිරීමට ශ්‍රේෂ්ඨාධිකරණය තීරණය කර තිබේ.

ඔහු තමා අත්අඩංගුවට ගැනීම වැළැක්වීමේ අතුරු නියෝගයක් නිකුත් කරන මෙන් ඉල්ලා මෙම මුලික අයිතිවාසිකම් පෙත්සම ඉදිරිපත් කර ඇති අතර අදාළ පෙත්සමේ වගඋත්තරකරුවන් ලෙස මුල්‍ය අපරාධ කොට්ඨාශයේ ප්‍රධානීන් සහ පොලිස්පතිවරයා නම් කර තිබිණි.

බැසිල් රාජපක්ෂ මහතා අදාළ පෙත්සම ඉදිරිපත් කරමින් ශ්‍රේෂ්ඨාධිකරණය ඉදිරියේ පවසා ඇත්තේ මුදල් විශුද්ධිකරණ පනත යටතේ තමන්ට එරෙහිව අධිකරණ කිහිපයක පොලිස් මූල්‍ය අපරාධ විමර්ශන කොට්ඨාශය විසින් කරුණු වාර්තා කර ඇති බවයි.

එමෙන්ම සාවද්‍ය කරුණු අධිකරණය වෙත ඉදිරිපත් කර තමන්ව අත්අඩංගුවට ගැනීමට පොලීසිය සූදානම් වන බවට ද අදාළ පෙත්සම මගින් කරුණු දක්වා ඇති බව වාර්තා වේ.

අදාළ පෙත්සම අද (08) අගවිනිසුරු කේ.ශ්‍රී පවන් මහතා ප්‍රමුඛ ත්‍රිපුද්ගල විනිසුරුමඩුල්ලක් හමුවේ සලකා බැලුණු අතර දීර්ඝ කරුණු සළකා බැලීමකින් පසු ශ්‍රේෂ්ඨාධිකරණය ප්‍රකාශ කොට ඇත්තේ අදාළ පෙත්සම පවත්වාගෙන යාමට තරම් නීතිමය පදනමක් නොමැති බවයි. ඒ හේතුවෙන් එය විභාගයට නොගෙනම ප්‍රතික්ෂේප කිරීමට අධිකරණය තීරණය කොට තිබේ.