දෙහිවලදී පාතාලය සමග පොලිසිය ගැටෙයි

දෙහිවල ෆ්‍රේසර් පාරේ දී සැක කටයුතු කාර් රථයක් පොලිසිය විසින් නතර කිරීමට ගත් උත්සහයකදී එම රථය අණ නොතකා ධාවන වීම හේතුවෙන් රෝදවලට වෙඩි තබන්නට පොලිසිය කටයුතු කළා. එහිදී එම සැක කටයුතු කාර් රථය පොලිස් වෑන් රියක්ද අනතුරට ලක් කරමින් තවදුරටත් ධාවනය වී තිබෙනවා.

ලැබුණු ඔත්තුවක් අනුව පොලිසිය මාර්ගයේ රැක හිඳ රථය නැවතීමට සූදානම් ව හිඳ තිබෙනවා. පොලිස් අණ නොතකා ධාවනය වූ කාර් රථය පිටුපස හඹා යෑමට පොලිස් රථයක්ද කටයුතු කර ඇති අතර සැකකරුවෙකු බසයකට නැග සිටිද්දී ඔහු අල්ලා ගත් බවයි පොලිසිය පැවසුවේ. කාර් රථයේ රියදුරා පළාගොස් ඇතැයිද පොලිසිය සඳහන් කළා.

එහිදී අල්ලා ගත් සැකකරු ළඟ තිබී රුපියල් ලක්ෂ 30 ක හෙරොයින් මත්කුඩු ද මුදලින් රුපියල් ලක්ෂ හතක් ද විදේශීය රටක නිෂ්පාදිත ගිනි අවියක් සහ පතොරම් තොගයක් පොලිස් භාරයට ගෙන තිබෙනවා. මෙම සැකකරු සමන්ත පෙරේරා නොහොත් චූවා සමන්ත නැමැත්තෙකු බවයි අනාවරණය වී ඇත්තේ.