අල්කයිඩා ත්‍රස්ථවාදීන්ගේ මීළග සැළසුම

ඉන්දියාව, පාකිස්තානය, බංග්ලාදේශය සහ මියන්මාරය යන රටවල ප්‍රහාර දියත් කිරීමට අල්කයිඩා ත්‍රස්තවාදීන් සැලැසුම් කරමින් සිටින බව එක්සත් ජාතීන්ගේ වාර්තාවන් උපුටා දක්වන ඉන්දියාවේ හින්දුස්ථාන් ටයිම්ස් පුවත්පත අනාවරණය කර සිටියි.

ඊයේ (26) හින්දුස්ථාන් ටයිම්ස් වාර්තා කර ඇති අන්දමට ත්‍රස්තවාදීන් 150-200 අතර ප්‍රමාණයක් ප්‍රහාර මාලාවට සූදානම් බව සඳහන්ය.

මේ සඳහා අයි.එස්.අයි.එස්. ත්‍රස්ත සංවිධානයේද සහාය ලැබෙනු ඇතැයි වාර්තාවේ සඳහන්ය.

මෙම පිරිස ඇෆ්ගනිස්තානයේ නිම්රූස්, හෙල්මන්ඩ් සහ කන්දාර් ප්‍රදේශවල සිට මෙම රටවලට පැමිණ ඇතැයි වැඩිදුරටත් සඳහන් වේ.

මීට පෙර අවස්ථාවක දී ආසියාතික රටවලට ප්‍රහාර එල්ල කිරීමට පාකිස්තානයේ ලක්ෂාර් ඊ ටයිබා හා ඉන්දියාවේ ඩාවුඩ් ඊබ්‍රහිම් කල්ලිය සමග කළ සැලැසුමක් ද ශ්‍රී ලංකා බුද්ධි අංශ මගින් අනාවරණය කර තිබුණි. ඒ අනුව මෙරට සිටින සැකකටයුතු පාකිස්තාන සහ ඉන්දියානු ජාතිකයන් පිළිබඳ අවධානයෙන් සිටින්නැයි විදෙස් බුද්ධි සේවාවන් මෙරට බුද්ධි සේවාවන් වෙත දෙවරක් අනතුරු අඟවා තිබුණි.