බුවනෙක හෝටලය රාජසභා මණ්ඩපයක් යයි මහාවංශයේ හෝ ලිඛිත සාක්‍ෂියක් නෑ.. ජනප‍්‍රවාදයක් පමණයි - පුරා විද්‍යා අධ්‍යක්‍ෂ ජනරාල්

මේ දිනවල ආන්දෝලනයට ලක්ව ඇති කුරුණෑගල නගර මධ්‍යයේ පිහිටි බුවනක හෝටලය පවත්වාගෙන ගොස් ඇති ගොඩනැගිල්ල බුවනෙකබාහු රජුගේ රාජ සභා මණ්ඩපය යැයි මහාවංශයේ හෝ වෙනත් ලිඛිත මූලාශ්‍ර කිසිවක සඳහන්ව නැතැයි පුරාවිද්‍යා අධ්‍යක්ෂ ජනරාල් ආචාර්ය සෙනරත් දිසානායක මහතා සඳහන් කරයි.

එය බුවනෙකබාහු රාජ සභා මණ්ඩපයක් යයි සඳහන් වන්නේ ජනප්‍රවාදයේ යයිද ඔහු සඳහන් කළේය.

මෙම ගොඩනැගිල්ල පුරාවිද්‍යා පනත යටතේ ගැසට් නොකළ එකක් වුවත් 1815 මාර්තු 2 වැනිදා ට වඩා පැරණි ස්මාරක සියල්ල පුරාවිද්‍යා රක්ෂිත බවට නිරායාසයෙන්ම නම් වන බව ද ඒවාට හානි කිරීම වරදක් බව ද ඔහු පෙන්වා දෙයි.

මෙම ගොඩනැගිල්ල ආරක්‍ෂක අංශවල සහයෝගයෙන් ප්‍රතිසංස්කරණය කිරීමට පියවර ගන්නා බවද පැවසූ ඔහු ඒ සඳහා ජනාධිපතිවරයා සහ අග්‍රාමාත්‍යවරයා උපදෙස් දී ඇතැයිද පැවසීය.

ගොඩනැගිල්ල එය 95%ක් පමණම මුල් තත්වයට ගැනීමට හැකියාවක් ඇතැයිද ඔහු කියා සිටියේය.

නමුත් මේ සඳහා යම් කාලයක් ගත වනු ඇති බව ද ඔහු සඳහන් කළේ ය.

මෙම ගොඩනැගිල්ල රාත්‍රී කාලයේ දී කඩා දමා ඇති බවත් ඒ සම්බන්ධයෙන් පුරාවිද්‍යා දෙපාර්තමේන්තුවට කිසිදු දැනුම්දීමක් කරන්න ඇති බවද කී ඔහු එහි පවත්වාගෙන ගිය බුවනෙක හෝටලය තුළ යම් අකටයුත්තක් සිදුවී ඇත්නම් ඒවා පාලනය කිරීමට නගර සභාවේ කාර්යයක් බව ද පැවසීය.

මාධ්‍ය හමුවක් අමතමින් ඔහු මෙම අදහස් පල කලේය.