2020 ජනාධිපතිවරණය ගැන GR, RW කියලා ඉරාජ් මියුසික් වීඩියෝවේ දාපු රහස මෙන්න

2020 ජනාධිපතිවරණය ගැන මේ වන විට විවිධ පුද්ගලයින් විවිධ අදහස් පළ කරනවා. ඒ අතරේ 2020 ජනාධිපතිවරණයට ඉදිරිපත් වන අරුම පුදුම අපේක්ෂකයෝ ගැනත් විවිධ කතාබහ කරළියට ආවා. ඒ විදියට දැන්ම තියා උණුසුම් වන 2020 ජනාධිපතිවරණය ගැන කියැවෙන සංගීත වීඩියෝවක් මේ දිනවල අන්තර්ජාලයේ ජනප්‍රියයි.

ඒ ඉරාජ්ගේ මනමාලි 2 මියුසික් වීඩියෝවයි..

ඉරාජ් මෙම මියුසික් වීඩියෝව තුළින් 2020 ජනාධිපතිවරණය ගැන ඉඟියක් පළ කරන්න උත්සහ කර තිබෙනවා?

නැහැ. ඒක එහෙම උත්සාහයක් නෙවෙයි. 2020 ජනාධිපතිවරණය ගැන ඒ රූප රාමුව ඇතුළත් කළේ ඒ විදියේ ඉඟියක් දෙන්න නෙවෙයි. ඒක 2020දි අපි රූපවාහිනිය නරඹමින් ඉන්නකොට දකින්න පුළුවන් එක දර්ශනයක් විතරයි.

එහෙත් ඒ දර්ශනයේ පෙනෙන රූපවලින් කෙනෙකුට අනුමාන කරන්න පුළුවන් නේද ඒ ඉන්නේ ගෝඨාභය සහ රනිල් වික්‍රමසිංහ බව?

ඕන කෙනෙකුට ඕන දෙයක් හිතන්න නිදහස් තියෙනවා. ඒ දර්ශනයේ GR සහ RW කියලා සඳහන් වෙනවා මිසක් කවුද කියලා පෙන්නේ නැහැනේ. නමුත් දේශපාලනමය විදියට ඒ දිහා බලන කෙනෙකුට ඒ රූප රාමු දිහා බලලා අනුමාන කරන්න පුළුවන් ඒ ඉන්නේ ඔවුන් දෙදෙනා කියලා. නමුත් GR කියන්නේ ගුණදාස රාජපක්ෂ වගේ නමක් වෙන්නත් පුළුවන්. RW කියන්නේ රජිත වීරසිංහ වෙන්නත් පුළුවන්. ඒ කවුද කියලා හිතාගන්න ඕන කෙනෙකුට නිදහසක් තියෙනවා.

නමුත් කෙනෙකුට හිතන්න පුළුවන් ඇයි ඔබ ඒකට MS, MR වගේ නම් දැම්මේ නැත්තේ ඇයි කියලා?

එච්චර දුරට මම ඒ ගැන හිතුවේ නැහැ. මට හිතුන නම දැම්මා.

එහෙම නම් ඔබ ඒ දර්ශනය ඇතුළත් කළේ ඔබේ අලුත් මියුසික් වීඩියෝව ජනප්‍රිය කර ගැනීමේ අරමුණින්ද ?

මම මගේ හැම නිර්මාණයක්ම වෙනස් ආකාරයටයි ඉදිරිපත් කරන්නේ. මේ ගීතය මට විශේෂයි. 2013 වසරේ මම ගීතයක් ගායනා කලාට පසු මේ දක්වා වෙනත් අයට ගීත හදලා දුන්නා මිසක් මම ගීතයක් ගැයුවේ නැහැ. ඒ නිසා කාලෙකට පස්සේ මම ගායනා කරන ගීතය අලුත් විදියට ඉදිරිපත් කරන්න අවශ්‍ය වුණා. ඒ සඳහා වෙනස් විදියේ මියුසික් වීඩියෝවක් කළා මිසක් එහි දේශපාලන ඉඟියක් නැහැ. නමුත් මම මුලින් කිව්වා වගේ ඕනෑම කෙනෙකුට ඕනෑම දෙයක් හිතන්න නිදහස් තියෙනවා.

සුරේකා නිල්මිණි ඉලංගකෝන් 
(ජනයුගය – 2017.09.10)