දැරිය දූෂණය කළ සුදු බාප්පා පැය 24 ක් යන්නට පෙර විවාහ වෙන්නත් අහලා

මොනරාගල වැදිකුඹුර ප‍්‍රදේශයේ නිවසක තනිවම සිටි 15 හැවිරිදි පාසල් ශිෂ්‍යාවක් බරපතළ ලිංගික අපයෝජනයකට ලක් කිරීමෙන් නොනැවති පසුවදා දැරියට විවාහ යෝජනාවක් සිදු කිරීමට ආ පුද්ගලයෙකු ගැන වාර්තා වේ.
සුදු බාප්පා නමැති වැඩිහිටි පුද්ගලයෙකු මේ ආකාරයට දෙමාපියන් බැහැර ගිය අවස්ථාවක් බලා දැරිය සිටි
නිවසට පැමිණ ඇත්තේ අසල්වාසී හිතවත්කම පෙන්වමිනි. වතුර එකක් බොන්න අවශ්‍ය යයි පවසමින් නිවසේ දොරට ගැසූ මේ දන්නා කියන පුද්ගලයාට පොඞ්ඩක් ඉන්න කියා වතුර ගෙනෙන්නට දැරිය ගිය අවස්ථාවේ ඇය පසුපස ආ ඔහු ඇයව කාමරයකට රැගෙන ගොස් කෑ ගසන්නට එපා කියා දූෂණය කර ඇත.

මෙම දැරියගේ දෙමාපියන් වගා කටයුතු සඳහා හේන්වලට ගොස් සිටි අවස්ථාවක් වූ බැවින් දැරියගේ උදව්වටද ළඟපාත කිසිවෙකු සිට නැති අතර මේ ගැන කාටවත් කිවුවොත් මරා දමන බවට බියගැන්වූ නිසා ඇය දෙමාපියන් පැමිණි පසුත් ඒ ගැන කියන්නට බියවී සිට ඇත.
 ”සුදු බාප්පා” යන නමින් හඳුන්වන සැකකරු පසුදා තවත් බීමත් පුද්ගලයන් දෙදෙනකු සමඟ මේ නිවසට පැමිණ තිබෙන අතර ඔහු ප‍්‍රසිද්ධියේ දෙමාපියන් ඉදිරිපිට දැරියට එන්නට කියා පවසා ඇත්තේ දැරිය හා විවාහවීම සඳහා තමා කැමති බවයි.
ඒ සඳහා තමාට සුදුසුකම් ඇති බවද ඔහු පවසා ඇත.
අනපේක්ෂිත යෝජනාවෙන් විමතියට පත්ව මෙම සුදුසුකම් ඇති කතාව කුමක්දැයි දැරියගේ දෙමාපියන් ඇයගෙන් විමසූ විට ඇය කාමරයට දිවගොස් හඬා වැලපී ඇති අතර දෙමාපියන්ගේ පෙරැත්තය මත පවසා ඇත්තේ සුදු බාප්පා තමාට අතවර කළ බවයි.
ඒ අවස්ථාවේ දෙමාපියන් සුදු බාප්පාට බැණ වැදී සිද්ධිය විමසූ විට ඔහු ඇත්ත සිද්ධිය හෙළි කර තමා දැරිය බාරගන්නට කැමති බව නැවත පවසා ඇත.
බාලවයස්කාර දැරිය විවාහ වීම ප‍්‍රතික්ෂේප කර තිබූ අතර දෙමාපියන් මේ ගැන පොලිසියට කියන බව කීමත් සමග සුදු බාප්පා අතුරුදන්වී ඇත.
දෙමාපියන් මොනරාගල පොලිසියට ඒ පිළිබඳව පැමිණිලි කිරීමෙන් පසුව මේ වන විට සැකකරු ප‍්‍රදේශයෙන් පලාගොස් සිටී.
මොනරාගල මූලස්ථාන පොලිස් පරීක්ෂක වේහිත දේශප‍්‍රිය මහතාගේ මෙහෙයවීමෙන් වැඩිදුර පරීක්ෂණ සිදු කෙරේ.